स्वामी विवेकानंद विद्यालय देवलापारने इतिहास रचला

राज्यस्तरीय बाल वैज्ञानिक स्पर्धेत दोन गटात प्रथम पुरस्कार 

देवलापार - सिंधुदुर्ग जिल्ह्यातील सावंतवाडी येथे आयोजित 51 वे राज्यस्तरीय बाल वैज्ञानिक विज्ञान प्रदर्शन 2023- 24 मध्ये नागपूर जिल्ह्य़ातील स्वामी विवेकानंद विद्यालयाच्या विद्यार्थ्यांनी दोन वेगवेगळ्या गटांमध्ये  प्रथम  क्रमांकाचे स्थान प्राप्त करून नवीन इतिहास रचला.

        या विज्ञान प्रदर्शनामध्ये विद्यालयातील तीन प्रतिकृती ज्यांना जिल्हा स्तरावर प्रथम क्रमांक प्राप्त झाला त्या प्रतिकृसह राज्यातून वेगवेगळ्या जिल्ह्यातून विविध गटामधील 400 च्या जवळपास विज्ञान प्रतिकृती सहित विद्यार्थी सहभागी झाले होते.  त्यामधील दिव्यांग प्राथमिक गटात नागपूर जिल्ह्यातील स्वामी विवेकानंद विद्यालय देवलापार येथील उल्हास वामनराव इटानकर यांच्या मार्गदर्शनाखाली वंश विलास मरसकोल्हे या विद्यार्थ्याने तयार केलेल्या 'वंश का हात सबके साथ' या प्रतिकृतीला राज्यातून प्रथम क्रमांक प्राप्त झाले. वंश दिव्यांग आहे. त्याला जन्मतः एक हाथ नसल्यामुळे दैनंदिन कामे करण्यासाठी त्याला अडचणी येत होत्या. त्यावर मात करण्यासाठी त्याने मार्गदर्शक शिक्षकांच्या मदतीने दिव्यांग लोकांच्या अडचणी सोडवण्यासाठी उपकरणे बनविली आहेत. तसेच त्याने दिव्यांग व जेष्ठ नागरिकांसाठी बनविलेली पहिली रॅम्प असलेली बसची चर्चा संपूर्ण विज्ञान प्रदर्शनात होती. 

 आदिवासी गटामधील प्राथमिक गटात विद्यालयातील केतन घनश्याम कामडी यांच्या मार्गद्शनाखाली आसावरी अशोक आस्वले या विद्यार्थिनीच्या मॉडर्न लाईफस्टाइल फॉर एन्व्हायरमेंट या प्रतिकृतीला सुद्धा प्रथम क्रमांक प्राप्त झाले आहे. हिने वॉटर पुरिफिकेशन करून पाण्याचा पुनर्वापर करणारे पहिले कार वॉशिंग सेंटर तयार केले होते. त्याच प्रमाणे समृद्धी हायवे वरील अपघात कमी करण्यासाठी टायर कुलिंग स्पॉट बनविले होते.        

        विद्यालयातील विद्यार्थिनी नेहरिका ठाकूरपेलने या विद्यार्थिनीने सुद्धा फ्री एनर्जी टाईल प्रतिकृती सह प्रदर्शनात सहभाग घेतला होता. गृहसुरक्षा करणारी व इलेक्ट्रिसिटी निर्माण करणारी टाईलची प्रतिकृती तयार केली होती. तिचे मार्गदर्शक शिक्षक सुनिल वेलेकर होते.

         आज पर्यंतच्या इतिहासामध्ये राज्य विज्ञान प्रदर्शनात एकाच विद्यालयातील दोन विविध गटातील प्रतिकृतींना प्रथम क्रमांक प्राप्त झालेले नाही. परंतु या वर्षी स्वामी विवेकानंद विद्यालय देवलापार या विद्यालयाने राज्य विज्ञान प्रदर्शनात दोन प्रतिकृतींना प्रथम स्थान मिळवत पहिल्यांदा हा मान प्राप्त केला. 

        विशेष म्हणजे वंश मरसकोल्हे च्या प्रतिकृतीच्या दालनाला महाराष्ट्राचे शिक्षण मंत्री दिपक केसरकर यांनी भेट देऊन वंशचे कौतुक केले.

       विजेत्या  दोन्ही विद्यार्थ्यांचे व  त्यांच्या मार्गदर्शक शिक्षकांचे विद्यालयात पुष्पगुच्छ देऊन सत्कार करण्यात आला. सदर यशाबद्दल संस्थेचे अध्यक्ष मा. जयंतराव जी मुलमुले, कार्यवाह मा. अरविंद जी जोशी, प्राचार्य जगन्नाथ गराट, पर्यवेक्षक जयंत देशपांडे, सर्व शिक्षक बंधू भगिनी व परिसरातील पालकवर्गानी प्रशंसा केली व राष्ट्रीय स्तरावरही सहभागी होऊन यश संपादन करावे यासाठी शुभेच्छा दिल्या.